Опубликовано 17.03.2013
Першы маладзёжны праваслаўны баль «Сретение-2013» прайшоў у Палацы культуры Маладзечна. Ідэя яго правядзення належыць кіраўніку духоўна-патрыятычнага аб’яднання «Светач» Ларысе Сысун. У арганізацыі свята прыняў удзел і мясцовы дабрачынны фонд «Спадчына Міхала Клеафаса Агінскага».
— Правілы баляў, у якіх удзельнічалі нашы продкі, распрацоўваліся з улікам духоўных традыцый беларускага народа, — адзначыў ва ўступным слове кандыдат багаслоўя іерэй Яўгеній Саўчук. – Танцы, якія раней практыкаваліся ў беларускіх вёсках, гарадах і мястэчках, былі чыстыя і цнатлівыя. Таму гэты баль можна разглядаць як спробу адрадзіць традыцыі танцавальнай культуры нашай краіны, як альтэрнатыву сучасным дыскатэкам.
І сапраўды, на сцэне сваё майстэрства паказалі лепшыя танцавальныя калектывы горада — навучэнцы гімназіі-каледжа мастацтваў, выхаванцы Маладзечанскай спецыяльнай агульнаадукацыйнай школы-інтэрната №2, удзельнікі эстраднай студыі «Жывы гук» і студыі бальнага танца «Каскад», ансамбля «Белыя крылы», танцавальна-спартыўнага клуба «Віртуоз» Дома культуры чыгуначнікаў, а таксама ўзорнага калектыву танцавальнага клуба «Грацыя» гімназіі №10.
На свяце выступілі лаўрэат шматлікіх міжнародных конкурсаў вакалістаў спявак Уладзімір Александровіч, выканаўцы аўтарскай песні Таццяна Беланогая і Алеся Кузняцова, музыкант Вольга Воінская.
Алег Бяганскі
(42)
Свежие комментарии