Мітрапаліт Павел: «Мы не смуткуем, мы радуемся…»

28 жніўня праваслаўныя вернікі адзначылі адно з дванаццаці найвялікшых царкоўных свят — Успенне Прасвятой Багародзіцы. Яно не толькі сведчыць аб заканчэнні Успенскага посту, адзінага прысвечанага Багародзіцы, але і завяршае царкоўны год.

Напярэдадні Прачыстай усяночную службу ў Свята-Успенскай царкве адслужыў Патрыяршы Экзарх усяе Беларусі мітрапаліт Мінскі і Слуцкі Павел. Найсвяцейшы патрыярх у другі раз наведаў Маладзечна. У сваёй пропаведзі ён расказаў аб значэнні хрысціянскага свята і правільнага разумення яго сэнсу. «У гэты дзень мы не смуткуем, мы радуемся», — падкрэсліў мітрапаліт. Успенне Прасвятой Багародзіцы – жалобная падзея як апошні дзень жыццёвага шляху Прачыстай, але найперш радасная па прычыне яе з’яднання з Сынам. Слова «ўспенне» азначае зусім не смерць, а сон.
Пасля царкоўнай службы мітрапаліт Павел павіншаваў вернікаў са святам і пажадаў усім Святога заступніцтва Божай маці, якая моліцца за нас усе дні. А прыхаджанам – любові адзін да аднаго, спагадлівасці і міласэрнасці. Менавіта гэта залог любові Госпада да ўсіх нас.